1. Lirthei chetsualna avanga hun eng emaw chen enkawl ngaia awm, Scotland-a mi, McLennan-a chuan kum 12 chhung tehmeuh mai sick leave a lak hnuin, kum 2007 khan a hna a zawm leh. Sick leave a la rei ve hle a ni.

2. Kum 1931 khan Manchuria, China-ah pa pakhat, a tukkhuma ramsa ang maia ki rawn chawr chhuak chu hmuh a ni a. He Chinese pa, Weng-a tukkhuma ki awm hi feet 1.1 zeta sei a ni awm a, ramsa ki nen danglamna a awm lo nghe nghe a ni awm e.

3. Romania police-te saw an remhre riau. Romania, Sibui County-a police-te chuan motor khalh chak tur ven nan an khawpui motor kawngpui sirah police car lem lehkhakhawnga siam chu an dah thin. Motor khalhtute’n police motor tak tak turah ngaiin an khalh fimkhur phah thin ni tur a ni.

4. A lua hliam awm avanga thi hnuanga a in chhuat laia lo let reng, doctor-in a en fel hnua thi-a a puan tawh, Romania-a cheng pitar kum 84 mi, Elena Albu-i chu forensic photographer-in a thla a laksak lai takin a rawn meng chhuak thut a, a lu nat thu a rawn sawi. Thlalatupa hi a phu chiang ve ngawt ang!

5. Bawnghnute sem thin putar pakhat, kum 81 mi ni tawh Derek Arch-a, Coventry (England)-a mi chuan kum 70 chhung tal tawp chu rinawm takin a hna a la thawk ta reng. A bawnghnute sem nana a hman thin a motor pawh kum 50 chuang a ni der tawh. Tuk tin, zing dar 2.30-ah thovin a inbuatsaih tan thin a, chawlh nei ve lovin kar khatah ni 7 tawp mai a hna a thawk thin. Tin, nitin km 13 vel kea vah kual a ngai thin a, in 400 vel a tlawh chhuak thin a ni.

6. An uite-te an morning walk-puina lama inchhar, Harriet-i leh Andrew Hathay-a, Dorset (England)-a chengte chuan an inkutsuihin an uite-te ve ve chu thianah an hmang teh mauh mai.

7. Gunbanlanya, Northern Territory, Australia-a police-te chuan an khawpui chhunga lo vak lut awle feet 612 vela sei chu lo manin taninah ni thum chhung an khung.

8. Coventry, England-a nupa pakhat, Paul leh Val Howskin te chuan an thenrual thate eng emaw zat sawmin an fridge kum 50 tlinna champha lawmna an buatsaih. An fridge kum 1959 kuma an lei tawh chu chhe lovin hman theihin a la awm ta reng a ni.

9. July 2009 khan robot anga inthuam mi 269 zette chu Dorset (England)-a Poole College campus-ah kalkhawmin minute 5 chhung robot style-in an lam.

10. Northern Portugal-a jail tang pakhat tlanchhuak chu kum 16 teh meuh mai an zawn hlawhchham hnuah kum 2009 khan an man ve ta hlawl a. Heng hun chhung zawng hian puk pakhatah a lo khawsa reng thin chu lo niin, inhnemhnan nan theirah a ei thin a ni. A sam leh hmuihmulte chu a lo sei hman tawh hle a, a kawrte lah chu a hlui chhiat tawh em avangin a lo tet hneng hnuang bawk a. Police-te pawh hian an hmuh hlim chuan an hai hial reng a ni. (He post hi vawi 397 keu hawn a ni tawh e.)

Hman kumah kan kohhran-in camp kan nei a. Pu VL Nithanga team-te kha kan ruai a, a lar vanglai kha a ni bawk a., a nuam khawp mai. Kohhran-ah tuiin a kul a taiah tang mah ila, ka lam ngai lo va. Zai hi chu ka peih khawp mai. Lam kher hi chu ka talent a ni lo ka ti thin a, ka thiante lamruiho hi ka buaipui mai thin.

Loh thei lohvin rawngbawltu camp-ah ka lut ve ta a. Hmeichheho hi kan kal hrang thin a, an team zingah khan pa pakhat hi mi a khawih chuan taksa chetna an chang mai thin a. Kan tawngtai rual a, taksa chetna an chang ta sup sup mai; kei leh nu pakhat hian kan chang ve thei si lo va, chu pa chuan min ngaimawh deuh a niang chu, a lo kal a, vawi nga vel min her kual a, min thlah mai chu! Taksa chetna chan chu khawi lam, ka lu hai lutuk chu chhuat laiah ka tlu tawp a, ka luak bawk a. Min buaipui nasa teh asin.

Tichuan, camp chhuah dawn zanah biakin chhungah kan zai khawm a. Lam turin min tur chhuak ve ta. Zak chung chungin hawi chhuak ngam lovin ka lam kual ve ta a. Lam kan tam bawk si, chutih lai tak chuan petromax, a êng a that loh avangin an lathla a, a hrui an pawt chho leh tur a thir kawmin ka sam tawn a bat fuh ta! Ka dak lawp a, ka kal thei tawh si lo, hnunga mite lam ka tibuai zo vek a! Nui lo pawh hi kan awm lo, ka zak lutuk hi lam nawn chu khawi lam, ka sam a pawh chhohna ka lu lah chu a na thum leh nghal. Ka ngaihtuah let hian ka nuih a za thin. (He post hi vawi 80 keu hawn a ni tawh e.)

2. “Ka pi, i zûnah maw ka lo uai a? Hraite i chawnpuar ka ni nem le…” A hre sual ve khawp mai!

3. Tlangval pakhat pawh khan nipui laiin a khawlum kawr turan leisak a, a lo chep kaw thluah mai a. A chhungte’n an hau va, ani chuan, “A lum lutuk a, ventilation ka siam alawm,” a ti ve tlat.

4. Naupang pakhat pawh hian patling hnenah, “Ka pu, zun in in nei em?” a tia, patling chuan, “Nei e,” a ti a. Naupang chuan, “Tlém ka lo ê..” a tia, chupa chuan a ngei raps mawle.

5. Chhura khan Nahaia kha over a ti thei raps.

6. Concert-naah a zai ve a, a sa sual chiang ve mai mai. Ring leh têng tawkin, “Val ngai lo zama tang ta che…” a ti liah liah.

7. Nula leh tlangval inngaizawng pawh khan chance an nei ve a. Tlangval khan a bialnu bulah, “Nang hi chu ka tana khuanu bel ruat ngei i lo ni,” a tia, nula chuan inlazei fahran, “Nang pawh ka tana a cooker ruat i ni ve tho alawm,” a lo ti nghal zat.

8. A bialnu kha sipaiah a tansan a, a training zo lo haw leh chu a bialnuin a lo patilsan daih.

9. Tlangval të pakhat pawh kha nula a rîm dawnin an uipa chungah a chuang thin.

10. Tlangval pakhat pawh khan kel a pu a, a kel put khan bê êl êl chungin a khabe-ah a kick a, a thiante’n an nuih a. “In hlimpui viau ami?” a ti tûm hmak! (He post hi vawi 549 keu hawn a ni tawh e.)

Vawi khat chu ka cousin nen zirtawpni tlaiah ka pain, “Bazarpuiah chawhmeh va lei rawh u,” a tia, ka putea scooter LML Vespa, rangkachak rawng ngei mai, hlui tawh tak chu kan hawl chhuak a. Ka pawnfen kha puan nal chi a nia, fenhnuai a nal bawk sia, scooter ke rah chhan lah a tla bo daih tawh bawk si.

Kan inphur phei ta a, ka thu nghet thei reng reng lo mai a, ka tla lek lek reng a, ka u chuan bak deuh hian, “Invuan nghet ta che mawle,” min ti a, ka titau chuan ka vuan duh lawi lo va. Tuna Shanghai 99 dawr zawn saw a biboh sia, ka sawt thla ta mai a! Ka tlu lo va, ka tla ding awt mai a, mi thenkhat chu an lo tê thawt a; ka zak lutuk chu chhuk tum sa reng anga lan tum chuan, ka u pawh au lem lo chuan chawhmeh chu ka zu leisan ta daih a.

Ka bazar zo, Zion Street-a ka kal chho chu, ka u chu a rawn hawi thla vak vak a, chak tawka rawn chhuk chu ka lo nuih a, min hmu chiah chu min hnek dawn amaw ka ti hial, a hmel chu hmuhnawm lo tak a ni. “Ka zawng nasa lutuk che,” a ti a, casualty-ah te scooter atanga tla an dah leh dah loh te a lo han zawt a, mangangin a lo tlan kual hrep tawh a lo ni a. Ka thil lei chu a la lawk a, “I duh leh bus-ah haw rawh,” a tia, min kalsan nal nal mai a, engmah ka sawi ngam tawh si lo va, a hnung lam atang chuan ka chiatkhum nasa teh asin. (He post hi vawi 786 keu hawn a ni tawh e.)

Biak ina an inkhawm laia thusawitu’n tui taka kalvari tlang chanchin a sawi dap dap laite hian inkhawm hruaitu hian ring lêng lâwngin ‘Nu ho kha thu tha rawh u. Pa hovin an awt ang e’ te hi a’n ti ta mai thin a. Thusawitu tân pawh khîk vur vur mai a awl duh viau âwm e.

Chutia, zahmawh sawi an hrât lutuk chu dik lova hriain ‘Biak ina zahmawh sawi hi a mâwi lova sawina hmun tûr pawh a ni hek lo. Chuvangin sim tawh ula a tha ang’ tiin zahmawh sawi chu an khap ta a. Anni chuan awlsamtein ‘ni e ka pu, kan sim hmak ang e’ an ti ve mai bawk a.

Chawlhkâr khat hnua an va kal leh chuan, ‘Zahmawh sawi in la hrât em?’ tiin an han zâwt a. Anni chuan ‘hrât tawh love ka pu, hmanniah pawh inkhawm laiin nu pakhat a thusuala kan haw tir daih an lo ti a. A hnu chawlhkar khat vêla an va kal nawn leh chuan an kohhran hruaitu hlun, an upa min ber chu an lo thunun (dân pawna hnawtchhuak) a. Heng hun lai hi chuan kekawr la ha ngai hek lo, inkhâwm kaihruaitute pawh hian puan an veng mai thin a. Pu Chhâwnate chuan ‘A engti tiha upa min berte thunun ngawt nge maw in nih le?’ tiin an han zawt a. Anni chuan ‘Inkhawm hruai laiin a puan ven do pâwng a lawm’ an ti a. A makpa kil khata lo thu ve chuan ‘Ka pu, a thiam loh pawh a ni bik lo. Nu ho vang vek a lawm. Inkhâwm laiin an thu duhdah lutuk a nih kha’ tiin a thlavâng a lo hauh sak a ni âwm e. An sim hneh hmêl khawp mai.

An thlanlunga an thu ziahte hi a’n hoin a’n mâwlmang thei khawp a.’A damlaiin chûmi chu a ngâi a. Chûmi pawh chu a ngâi a. A sandamtu (chhandamtu) tawng maw tawng lo maw?’ tihte mai mai hi an ziak a. Thanlung thenkhatah chuan ‘Dara, hlo thlawh laiin a thi. Hei hi nilaini a ni. Thi ta lo ang se chuan, a thlawh zawh tawh hi vantlâng rin a ni tih te, ‘A damlaia a thiltih that te:- ‘A, Aw’ a hrechhuak, tumah a hau lo. Vawmtlâk pawh a siam thiam’ tih te, Savawm nên an intâwka a melh zâm a vangin hmana thi tawh tûr kha tûnah a thi ve chauh a ni’ tih te leh ‘A damlaiin lung dêng thui ber lâwmman pakhatna vawithum lai lâk a tum tawh’ tihte mai maiin an tial râng ve buai a ni âwm e.

Tûnhma Sialsir khuaah khân parâwnkâi, hmangchâng hre tak tak kha an kat nuk mai a. Chunghoina remchâng an han lei thiamzia leh an ngaihtuahna an chhawr tangkai thiamzia mawlh mai kha, a hunlai ngaihtuahin hahîpa sawi tham zu tling ve tlat amaw le..!?

Tumkhat chu YMA-in sumtuak dân tûr ngaituahin ro an rêl a. An president Pu Thangkhuma chuan silima (cenema) chhuah a rawt ta tlat mai a. A rawttu, amah Pu Thangkhuma ngei pawh chuan, a hming leh an chhuah thin tih bâk chu eng ang chiah nge anih a hre bik dêr bawk si lo va. Bangbo hlawm viau mahse, hotupa berina rawt ta tlat chu tiin lungrual takin an remti tlâng ta a. Tichuan, tlangau ruaiin khawchhungah an au kualtir a.

Tlangau chuan, ‘khâih khâih khâih..lo ngaithla theuh rawh u. Mister LMA (Minister MLA) in silima chhuah tûr YMA a pe a. Zaninah YMA rûnah chhuah a ni dâwn a. A en man chu buhfai sêr khat a ni ang’ tiin a au a. A hming chauh chu hre hlawm mahse, eng ang tak nge a nih hre miau hek lo le. Naupang chu sawi loh, puitling leh tar kiring chenin an en châk chu, naupang sa hmeh tûr ang maiin an za sek tawh hlawm a. Zanriah chaw eikham vêleh YMA rûn kawtah chuan, a khawnâwtin an tlim hmur tawh mai a.

Tichuan kawngka pâwn lamah leh chhûnglamah vengtu insiam a, pakhat tê têa luhtirin ‘Tikhân i va lût ang a. A lai takah khân thlangrâah changêl hnahin kan khuha, va en mai rawh u’ an ti a. Va lûtin thlangra khuhtu changêl hnah chu an han keu hawng a. Bawngêk tum lian tha tak mai hi alo thu luau mai a. ‘A va ho mai mai e aw’ an han ti nang nang a. Mahse, chhûnglama vêngtu khân tumah hrilh lo tûrin a lo hrilh zêl a. A hnuhnung lamah an hotupa ber Pu Thangkhuma nu, pitar kum 80
ralkâi tawh pawh chu, thei leh thei lovin a rawn inhawl chho ve tawi tawi a. Kawngka bula lo awm Pu Thangkhuma hnênah chuan ‘Bawiha, khaw maw..in thil chhuah chu ka lo en ve ang e’ a ti a.

Pu Thangkhuma chuan ‘Aw, Ka nu hi chu i va’n hâwkdâk tak êm. Tarte chuan en ve ngai em maw’n le’ a lo ti a. A nu lah chuan ‘A hmuhnawm in ti sia ka en ve châk alawm’ a lo ti sam et mai bawk si. Midang khã zât luhtir tawha a nu han luhtir loh bik chu tih chi niin a hre bawk si lo. ‘tikhân va lut la, thlangraah changêl hnahin kan khuh kha va en mai rawh’ a ti a. A va en nâk chuan bawng êk tum lian tha tak a lo thu luau mai si a. Pawn lam kawngka bula thu a fapa chu va auin ‘Bawiha bawng êk mai mai alawm maw le. In va han ti ho mai mai tak êm aw’ a va ti lêng lêng mai a.

A au ri chu hriain a dawt chiaha luh tum, nghakhlel taka kawngka bul sêta lo thu, Pu Thanchhûma chu a lût ve duh ta lo va. Pu Thanchhûma tih loh chu, a khawnâwtin an en kim deuh vek a ni âwm e. Buhfai pawh tam tak hmuin an lilâm leh a. Cheng sawmhnih lai an hlawhchhuak a ni. Chung hunlai chu pachangin nitla vanvuaia cheng hnih an la hlawh lai ngang a ni a. An hlawh tam dân chu i chhût thiam ve ruak ang chu maw? (He post hi vawi 468 keu hawn a ni tawh e.)

2. Tun ang fur lai chuan siliper letling zawnga bun vek tur. A chhan chu keimahni vaw berh lovin kan sira mite a vaw berh char char.

3. “Thiani, i kawr chu a va var nalh sar sar ve…”
“Nia, tui pawlh loh a nih hi.”

4. Zobawk lan theihnaah dingin a lo thlir vang vang a. “Eng nge i va thlir nasa ve?” an ti a. Lei seh ruha vei thlek ngur chungin, “Zobawk-ah saw’n ka hming anpui a awm a, tunge a hming kha aw… Ka hre chhuak zo lo va…” a ti heu mai.

5. Zirtirtu: Eng nge Chapchar Kût hi a awmzia?
Naupang: Lo an vat a, an vah hnuah an chap a, an char a, chu chu Chapchar Kût an ti.

6. Zirtirtu: What do you want?
Naupang: (Tih ngaihna hre lo hawi vual chungin) What do you two?!

7. Zirtirtu: ABC han sawi teh.
Naupang: Sir, hawrawptêin nge ka sawi dawn hawrawppuiin?

8. A hming kha ‘Vanthilpeki’ a nia, ‘Thil-i’ tiin an ko thin.

9. A hming kha a common lo ve asin, ‘Elizabiaki!’

10. A mawng kha a poh mai mai asin. A kawngkal te hi a chheihlam nghal zel. (He post hi vawi 216 keu hawn a ni tawh e.)

Kan high school kal ve lai a nia. Inrinni sikul chawlh te a ni bawk a, ka thian hmeichhia pathum leh mipa pakhat hian lui kalpuiah min sawm a, ka hmelin a zir loh vang nge ka hmel hi a ram vak mi hmel zawk pawh ka hre chiah bik lo, ram vahpuia sawmtu hi ka nei thei riau a.

Hemi tum pawh hian ka lo star ruk ve deuh a tel dawn avangin ka phur ve hle a, kal dawn tak takah chuan ka thianpa chuan harsatna chhuanlamin min thulhsan a, kei leh ka thian hmeichhe pathum chu phur takin luidung lam pan chuan kan inzuithla hnak hnak a.

Lui kan thleng a, chakai khawrhin lui hnar lam chu kan zawh chho ta a. A hmasa berah ka ka kal a, chakai ka man dawn lai tak chuan ka thiannu ka lo sitar ve em em chu hlauh nei tih hriat mangkhengin a rak tuar tuar a. Ka tlanthla vat a, thil awmzia ka zawh chuan – hmmm…a point-ah tak mai hian vangvatin a lo luhkhung chu niin! A thian hmeichhe dang khan an laksak ngam bawk si lo, a mipa awm chhun kovah a tla ta!

Ka nuih a za, ani rak chul bawk si, “Lehlam hawi chungin la rawh, rawn hwi reng reng suh ang che,” a ti ta mai, lehlam hawi chungin ka va dap, a ni tur âwm bera ka rin chu ka’n phih thawt mai a. “A nâ…!” tih leh ka beng kiu vawng vawnga ben a rual ta mai! Karei karei! A ni lo zawk ka lo man chu niin, ka zak bawk si, ramhnuaiah ka tlanlut a, pum na vekin ka nui. A pasal neih hnu thlenga ka hmuh hian ka nui lo thei lo, a la sen tân tân zel.

Ka van man sual chiang tak! (He post hi vawi 279 keu hawn a ni tawh e.)

Zanriahte an han ei kham chuan, a dân pangngaitein Pu Kawlbâwiha chu a lêng chhuak leh a. Pu Lalkherha khân Pu Kawlbâwiha nupui chu koh ta lêmlo chuan khawi khawiah emaw a thep kual vel mai mai a. Enge mawchen a thep kual hnu chuan Pu Kawlbâwiha chu a lênnaah va zawng chhuakin ‘E.. chu chen chen lên te chu maw le? Va hawng tawh khai, in nu pawh a lo haw tawh kha. Saw pui, nu chhûr pui tawh si, mothar tehchâwk a inchan thar tha leh ni maw? Nang ber i lo awm bawk si lo nên, inlêng i lo fahran pawh thingpui lum tha ngam lovin pindanah a tawm tlat saw’ tiin a thingpui no dawm laklawh lai chu va turin a chhuahsan leh nghâl vat a.

Pu kawlhbâwiha chu tlânkhalhin a pindanah mua lûtin an khumah rizaiin a lo inlukhûpa. Pu Kawlbâwiha pawh a phûr ngang ni tûr a ni. Vai vawih aia rangin a lo thleng phei chawpchilh nghâl mai a. An inlênglo thu deuh tuai ho pawh chu be lûmlâm lovin pindanah a lût tlang nghâl a. Khuma rizaia inlukhûpa lo mu chu an nu emaw tiin ‘E, nu-i i lo haw ta maw, ka va han lâwm tak êm! Zanin atang ngeiin nupa nun thar kan din ang a. Keipawh i tân pasal thar ni tûrin ka in huam khawp a nia’ tiin rizai chu a’n keu va. An nu awzâwng ni lovin Lalkherha chu a lo mu kûk mai si a. A hrilhhai han hamhaih lai chu chuhin Pu lalkherha chu a tlân chhuak a. A ni Kawlbâwiha zak lutuk chuan a um chhuak nghâl a. Khawlai, zan thim leh nghalah pachang leh pachang an inthlûr ta ngian ngian mai a. A tawpah chuan Lalkherha hah lutuk chu lo thuin ‘chutianga han haw ngam tur bik i awm em ni? Satel lema ka chan tuma khawngbawk mipui khâ zozai hmaa min tih zah zia kha ngaihtuah ta che’ a lo ti chu an pahnihin an nui dûn hawk hawk mai a ni.

Hemi tuma an nu nên an intih thiam lohna ni âwma Pu Lalkherha sawi chu.. An nu mihlim a ni a. Chhûng inkhâwm an neih thinah an nu chuan Pu Kawlbâwiha chu hun hmang tûrin a ti ve thin a. Ani la piangthar bawk si lo nên a pha ziah thin a. A tur zing ta lutuk chu a ning ta deuh a niang, chawlhni tûk khat chu ‘khawi’nge ka’n hmang ve poh a nge’ tiin a ding hluai a. Lalpa beram tih chãngthlanin a fate chu, ‘Nangni hi berãm notê te in ni a. Kei hi a pa tiltawlh ka ni a. In nu hi..’ a ti hman chauh a, a sawi belh leh hmain an nu chuan ‘ho lutuk ho lutuk, fate u chaw ei kha siam nghal rawh u’ a lo ti vin tuarh a. Holam deuhin an tiltiak ta ringawt mai a ni ãwm e.

Hualngo rama rawngbâwla han awm thin thuhriltu lâr Pu Chhâwnluaia khan an chanchin a sawi thin a. Ani kha pa hmui themthiam zet mai, hmuh in ang rengah pawh sawi ngaihnawm thiam bik, tlachawp pawha nilêng daih tûr pâi reng kha a ni bawk a. Eng emaw zât te hi chu a phuah belhte pawh a ni nawk âwm e. Chûng chu a thena zâr i’n thur chhuak ve teh ang.

Khatia chanchin tha hrila an han awm kha, an mâwlmangin mi ningkhawng an man lo viau mai a. Bul tan nan lehkha an han zirtir a. Bang hnawih dumah A Aw A B a’n ziak a. Chutah ‘ka sawi zawhah ka sawi ang chiahin insawi ve dâwn nia’ tia ‘A’ chu kâwkin ‘A’ ti rawh u le’ a han ti a. Anni chuan ‘A’ ti rawh u le’ an ti rual ve ta thup thup mai a. Pu Chhâwna chuan kâwk leh va chungin A chauh ti tawh rawh ule’ a’n ti leh a. Anni ho chuan ‘A’ chauh ti tawh rawh ule’ an ti rual leh ta thup thup mai a. A zirtirtu tân chuan a manganthlâk duh hle âwm e.

Enge maw chen an inzirtir hnua ziak leh chhiar an han thiam tantir chu zirtirhbu an pe a. An han chhiara ‘Thangsira pain mai a lum e huiah, a zuan e huiah’ tihte, chu Pathian thu emaw tiin an tahpui ngâwih ngâwih mai a ni âwm e.

Tum khat chu, mual inkhâwm an hmang a. Pu Chhâwna’n Pathian thu a sawi dup dup lai chuan, thlawhna tê chi, kawptar hi a rawn thlâwk vû vû mai a. Hmâna paihte Mangchîna khâitu Murâ kha emaw tiin an tlân darh chum chuma ngaw kârah an pilbo zo ta vek mai a. Kawptar khalhtu chuan han biak lûmlâm tûr tumah hmu hek lo le, a thlawk chhuak leh ta ringawt mai a. A thlawh liam hnua an rawn chhuah khâwm leh chuan, ‘a lo kal leh huna a awh nân tiin pa pakhatin hnângdîlin thang a lo tungthlun a. An ngaihthat phah hlê hlawm a ni âwm e.

Zahmawh sawi hi an hrâtin nuam an ti êm êm mai a. An la mâwlmang ve bawk nên a hun leh a hmun thliarin thlu thiam ve tawh hek lo le, Inkhâwmnaah te hian zahmawh sawia nui kur kur tâwk an kat nuk mai a. Vawikhat an inkhâwm pawh, kil khata pathlâwi rual thu khâwmin thusawi ngaihsak lo lêka zahmawh sawiin mipa thil leh hmeichhe thil an lo sêp rawtui ve khawp mai a. Pakhat chuan ‘ A’n châk tak tak hi chuan mi hi a rawn râwn do mai a. Kutke phei chu nei sela, mahnia leipui vêng tham a niang chu mawle’ a ti a, an nui kur kur mai a. Pakhat leh chuan, ‘hman zân chu kan nu thil ka enchian sak e ka ti a, a khabawr a lo tam khawp mai a. Rawh ung thial thualin ami sa tiin zuar ila. Khawi maw laiah chuan lei duh tâwk an awm maithei a ni’ a ti a. An thûm leh hak thin a. Pu Chhâwna chuan inkhawm hruaitu chu khap tûrin a’n ti a. A ni chuan va auin ‘Ngawi tawh rawh u, in sawi ho ngeu ngo e mai. Zunte pawh in tichhuak rum rum alâwm. Khawi’nge ka va zung pîpû duah teh ang’ a la ti hrâm a ni âwm e. (He post hi vawi 200 keu hawn a ni tawh e.)

2. Zirlai pakhat pawh kha class 10 a pass ve a. A thiante’n, “Nang eng subject nge i lak dawn?” an tia, inla changkang tawkin, “Hindi ni phawt se, a dawtah Mizo,” a ti vel.

3. Zing dar 3 velah rui zetin a haw a. Chaw ei tur a zawng a, a awm si lo. Dar 3 vela chaw a’n phit mai chu, a chhungte an sa rem rem!

4. ‘Zawngpalian’ tih chu a haw lutuk, mahse, ‘Hanuman’ tih chuan a nui vur vur zel.

5. An khaw zaithiam kha an han ngaisang awm asin. A zai kha an khuaa phone nei zawng zawngin ringtone-ah an hmang vek.

6. Vawi khat chu kan thianho rui phur leng hi kawng sirah chaw ei an lo awm laih laih a. “Fuh lutuk!” tiin kan ei ve hmiah a, pa pakhat hian, “In ve fel cve. Mami thiante em ni in nih?” a rawn ti a, kei chuan, “Ni lo ve. A mipa lam kan nia,” ka’n ti ngawt pek a. Pass lawm an lo ni sia, kan zak rap!

7. Lumehna dawrah khan lu ka mehtir ve dawn a, kan tam sia. Ka lumettu tur kha a tawng duh khawp mai a, a tawng bawrh vawrh mai a. An meh duhdan tur te kha a zawt zel a, an duh ang khan a mehsak zel a. Putar hun a lo thlen chuan, “Ka pu, nang engtia meh nge i duh?” a tia, putar chuan, “Kei chu maw, ngawi renga meh ka duh,” a ti chu kan en thap mai; kan dem lo, a tawng duh em alawm; kan thiam khawp mai, âwm kan tihpui e.

8. Vanduai:
Nula: Dam em duat?
Tlangval: Dam e duat. (Sending failed)
Nula: Duat, min reply ve la…
Tlangval: Duat, reply char char che asin. (Sending failed)
Nula: Eng nge awmzia? Min be peih lo va, min duh tawh lo mi?
Tlangval: Duat, ka hmangaih chein ka duh takzet che asin. (Sending failed)
Nula: A tawk e, mi rawn be tawh suh. Kan inkar a tawp.
Tlangval: A ve khanglang che chuan. (Delivered)

9. Zirtirtu: Pig hi eng nge?
Naupang: Vawk.
Zirtirtu: A nih leh picture?
Naupang: Vawk lem.
Zirtirtu: A nih leh picnic?
Naupang: Vawksa ei khawm.

10. Zirtirtu: Khawvela lizard lian ber eng nge?
Naupang: Crocodile. (He post hi vawi 950 keu hawn a ni tawh e.)

1. Romeo Adrales-a, kum 33 mi chuan, a lumehtir chu fiamthu thawh nana a thiante’n an lo hmansak avanga thinurin a lumettupa, Bonifacio Delgado-a chu va panin a kaphlum riap mai! Tanina an kawmnaah chuan heti hian a sawi zui nghe nghe. “Ka lu meh dan hi ka thiante hovin an lo nuihsawh avangin ka thin a rim a, he thil hi ka tih phah ta a ni,” a ti. “Tin, tun hi vawi hnih tawp min meh sualsakna a lo ni ve tawh reng reng bawk,” tiin a sawi zui bawk.

2. Thawk khat lai khan Siberia-a cinema hall pakhat-ah chuan, ticket man nei zo lo tan artuiin ticket an leitir thin a, a hnua artui supply a tlemin bottle ruakin an thlengtir ve leh thung.

3. A pasal irhfiak tihrehsak a tumna lamah a thih phah ta hlauh mai. Buenos Aires-a nu pakhat chuan, a pasal irhfiak reh thei lo mu lai chu hmaikawr vuahin, a irhfiak tihrehsak tumin a va barakhaih ve teh ngawt a, a tisual chiang hle mai. An pa, Nestor Lutz, kum 48 mi chuan misual ni turah ngaiin chemte-in a lo vithlum siah mai a ni awm e. Nestor-a hi police hnenah a inpe zui nghal a ni.

4. Spain-a ui pakhat chuan a pu boralna damdawiin kawtah kum 7 chhung teh meuh mai a pu a la nghak ta reng. He ui hi a pu mitdel leh diabetes nei chuan amah puitu ber atana a hman thin a ni a, damdawiina hruai thintu pawh a ni. Tuk khat chu damdawiinah lungphu chawlin a pu hi a boral ta hlauh mai a, mahse, he ui hian haw zai reng a rel duh chuang lo. A pu a nghahna thin damdawiin kawtah chuan a awm ta char char mai a ni awm e. A vela chengte hovin he ui rinawm tak hi chaw an lo pe thin a ni.

5. Light bulb upa… Mary Tapsell, kum 95, Rainham, Kent-a mi chuan a ina light bulb pakhat chu kum 61 chhung a invuah tawh thu a sawi teh khiah. He in a luah luh ni atanga kum 45 hnuah pawh he bulb hi la thlak ngai lovin a la êng thei reng a ni awm e. Kum 61 liam taa he in sak a nih atangin la thlak miah loh nia a rin thu a sawi a ni.

6. Ivory Coast-a mipa zahmawh (penis) dawi tê thina puh dawithiam pasarihte chu khawtlangin an sawisak rawn hrep hnuah a nung chungin a rualin an hal hlum phiar mai.

7. Waldoboro, Maine-a mipa phir, Gary Nisbet leh Randy Joubert-a, an sen laia lak hrana awm te chu kum 55 hnuah an intawng leh teh nawlh mai. Randy Joubert-a hian a unaupa hnathawhna hmun tak kawr zawrhna dawrah chuan va thawk ve chatin, chutah chuan an inchhar leh ta a ni. Unau an ni tih hi an inhre nghal mai bik lo va, an inhmuh hlim chuan an hmel leh pianzia a inan em avangin an innuih tawn vel mai mai a, mahse, a hnua an chanchin an han chhui chian nak chuan phir an lo ni reng tih an hmuchhuak ta hlawl mai a ni.

8. Kum 1934-a US-a bank rawk thubuaia an man, John Dillenger-a pistol tê chi, .41 calibre chu kum 2009 khan an lilam a, mi pakhatin $95,600 teh meuh maiin a lo khul chhuak. He silai hi Dillinger-a, Tucson, Arizona-a an man tumin a mawzaah a lo pai a ni.

9. Devon, England-a Keith Green-a leh Christine England-i te chuan April, 2009 khan cartoon film ‘Shrek’-a te nupa anga incheiin an inkutsuih. An inchei nan hian darkar 3 chhung vel hun an hmang nghe nghe.

10. Japan khawpui Tokyo-a school pakhatah chuan zirtirtu robot an nei mauh mai. He robot a hming Saya tia an sak chu mihring pangngai ang thei ber tura a hmel leh pianzia pawh duan a ni a. Mihring tak ang maiin lungngai hmel te, lawm hmel te, thinur hmel te, hlau hmel etc a pu ve thei thlap bawk. Hei chang ni lovin zirtirtu tak ang maiin zawhna leh chhanate pawh a siam thiam ve vek a, tawng chi hrang eng emaw zat a thiam tel nghe nghe. (He post hi vawi 327 keu hawn a ni tawh e.)